Utviding av tida med stengde skular – fram t.o.m 13.april 2020
Margaret rektor skriv følgjande (veldig lurt å lese heile artikkelen):
Styresmaktene bestemte i går å vidareføre stenginga av skulane, i denne omgang fram til og med 13.april 20 (2.påskedag) og den nettbaserte undervisninga må halde fram.
Så langt har det gått greitt. Ulstein vgs har ikkje så langt gjennomført noko undersøking blant alle elevane, men ein del kontaktlærarar har stilt spørsmål til sine elevar og dei tilbakemeldingane har vi i leiinga fått.
Det synest å gå bra. Det tekniske fungerer og elevane «møter». Ulstein vgs har bestemt å køyre «undervisninga» etter oppsett timeplan og at elevar og lærarar møtest i starten av undervisningsøkta til ei fellessamling. Deretter vert det opp til læraren kva han/ho gir av vidare arbeidsoppgåver og korleis dette skal leverast inn/leggast fram.
Arbeidsmengde
Vi trur det er viktig å ha noko fast å gå til kvar dag når ein opplever ein slik unntakstilstand, dvs at vi held fast ved ein så «normal» skulekvardag som mogleg. Tilbakemeldingar tyder på at det vert opplevd som OK frå elevane si side også. Det vi får tilbakemeldingar på er at arbeidsmengda kan bli i største laget. Dette er kommunisert ut til lærarane og vi håper og trur det vil betre seg, men det er viktig at elevane, eller dei føresette, gir tilbakemelding til læraren, kontaktlæraren eller leiinga om arbeidsmengda vert opplevd som problematisk stor og stressande. Det er mange ting som stel energi desse dagane og det er ikkje skulen si meining å «knekke nakken» på elevane.
Vurderingar
Det er framleis ikkje bestemt om eksamen skal gjennomførast som planlagt. Det vi veit er at standpunktkarakter skal settast. Ei avklaring rundt eksamen eller ei, håper vi skulane får før påske, men det kan vere vi må vente til etter. Fell eksamen bort er det berre standpunktkarakteren som vert gjeldande. Difor er det viktig at skulen får gjennomført eit minimum av vurderingar, slik at standpunktkarakter kan settast på breiast mogeleg grunnlag.
Behov for nokon å snakke med
Alle i skulen kan kontaktast om ein har behov for nokon å snakke med, enten via telefon, e-post eller chat. Skulen sin helsesjukepleiar, Hanna Moldskred, vil også prøve å vere disponibel for elevane per telefon/sms. Ho kan kontaktast på tlf. 915 39 713.
Søknad høgare utdanning
Det nærmar seg søknadsfrist for høgare utdanning. Trass i unntakstilstanden vi er i er det viktig at ein søkjer slik ein har hatt planar om. Søknadsfristen er 15.april. Avgangselevane finn ein del informasjon her: https://mrfylke-my.sharepoint.com/:w:/g/personal/liv_berit_ose_mrfylke_no/EdCyVDocqvdDhBoPuzHDMZoBgONJFnBWeWqJrTS0ZEUWFQ?e=fj5j1S
Ei krevjande tid for alle
Dette er ei krevjande tid for alle, både elevar, lærarar, foreldre og familie. Vi må gjere vårt beste for å kome gjennom den på ein så god måte som mogleg. Vi har sjølvsagt fokus på skule og opplæring, det er samfunnsoppdraget vårt. Vi håper at elevane våre har så bra moglegheiter til å følgje med i undervisninga som mogleg, men vi ser også at det kan vere ulike føresetnader for det, særleg når dette vert strekt ut i tid. Nokre elevar vert også bedne om å ta eit samfunnsansvar gjennom jobb t.d. i helsesektoren. Det stiller vi oss positive til, men minner dei likevel på viktigheita av å følgje med i faga.
Så ønskjer eg alle lykke til med denne dugnaden for folkehelsa, i ein situasjon vi aldri ha vore i før og som vi heller ikkje veit fasiten på. Ta kontakt med skulen om det er spørsmål eller behov for avklaringar av nokon art.
Hjørungavåg, 25.03.2020
Margaret Alme
Rektor